ꒉꉗꂘꃀ

◎ꐚꑕꒈꎆ

ꅇꂷꋋꑍꇁꌔꇬꉠꉌꂵꈐꏭꈁꄽꀀꈁꄽꉪꀐ，ꉢꌶꌺꂷꉬꄸꌶꅉꐥꑴꌦꅉꄉꅑꌷꅐꌶꐞꄮꇬꑟ，ꆃꎭꃅꈋꄉꀀꅷꉪꅷꍬꐕꃅꄷꈴꇈꑭꊗꃅꈋꑟ。ꉬꃅꉬꇬꆹ，ꅇꂷꋋꑍꇁꌔꇬꈐꏭꉂꅇꉂꏣꉂꑟꄚꐊꄚꉔꄚꁊꌐꏭꐛꀐ。

ꎺꁯꂷꇭꌟꃅꁨꑭꊏꌊꈝꃀꌐꇁꌶꌺꀧ，ꊸꑭꊏꌊꌶꌺꇭꀧꌋꆀꉌꃀꊸ，ꉙꇁꂘꅇꐎꃅꏂꄣꌡ，ꑌꆳꌟꃅꊷꆣꀕ，ꒈꏾꌟꃅꎮꎭꂿ，ꒉꐑꌟꃅꐝꍠꀕ。ꅉꀕꃅꐥꐨꂚꃨꊏꌊꆀꃅꎔ，ꅉꀕꃅꐥꐨꐚꒉꍘꇁꁦꀑꐔ。

ꌶꌺꂷꉬꄷꇬꂘꃀꉙꋒꂘꋒ、ꌧꇐꂿꇐꌋꆀꉪꇐꃅꇐꆼꇨꑠꂷꊝꇬꆹꁌꃅꁌꇐꈤꇈꊽꉌꇿꉌꐡꑠꐘ。ꃶꐚꃅꇬꆹꒉꌶꅉꇬꌷꀋꆹꌦꇰꆐ，ꒉꉗꂘꃀꂓꆹꈁꄽꈨꀐ，ꒉꉗꂘꃀꃆꂮꁮꅉꑌꈁꄽꅲꀐ，ꋍꈭꐨꄡꇗꐰꅲꉎꅲꃅꄉꑌꈁꄽꅲꀐꌠ。ꒉꉗꂘꃀꆹꆀꉙꉷꉙꊝꀋꌋꑠꂷ，ꐩꋊ、ꅺꊈꌋꆀꁮꅉꑠꇓꁨꀖꌠꌡꃅꋍꈄꇈꋍꈄꃅꀖꌊꌶꌺ“ꁵ”，ꌧꇐꂿꇐꇱꄓꊂꆈꄉꃬꌊꇁꌠꀋꏮꋍꎴꇈꋍꎴꃅꃬꌊꌶꌺ“ꁵ”。ꌶꌺꋍꏅꋌꉜꐯꃅꐯꌠꌡ，ꋍꂷꈐꀋꄉꋍꂷꉈꀋꄉ，ꋍꊱꊏꀋꄉꋍꎴꂁꀋꄉ，ꋍꃀꁨꀋꑌꉌꂵꄅꀋꑌ。ꂘꄟꂘꏦꆹꄆꒌꃑꌠꌡ，ꁮꅉꅲꌠꌡꃅꊽꉌꐡ，ꑠꃅꐛꅹꉪꊇꆹꀋꈨꀋꈨꏦꄉꅳꀧꄖꌊꉌꊢꑓꊢꌷꑟꃅ，ꀋꎺꀋꎺꇁꌠꐒꄉꁱꀙꄌꌊꁱꄉꀱꇊꌷꅉꃅꇬꎷꑟꃅ。ꅇꉉꇬꇉꃹ，ꉈꈻꁻꌐꌸꌠꐥ，ꒉꉗꂘꃀꉉꌠꅇꎔꅇꃨꆹꏂꅪꌟꃅꇗꃅꇗꄃꀕ，ꋍꇬꊰꇬꁌ、ꋍꎴꊰꎴꁌꌊꊽꉌꂵꌸ、ꉉꌊꊽꏯꈐꊟꊋꊡꇭꀧꄚꐊꊋꑌꏢꑌ。ꉪꊇꀊꉘꉪꀋꐚ，ꃅꐳꄔꀋꐽ，ꋍꃢꋍꃢꃅꑽꏿꑽꋻ，ꋍꃢꋍꃢꈭꑽꈜꑽꋻ，ꋍꃢꋍꃢꆺꒉꄇꒉꋻ，ꑠꄮꇬ，ꒉꉗꂘꃀꆹꊒꆽꀕꃅꉪꊇ“ꏈ”ꂘ，ꃶꐚꃅꇬꆹ“ꏈ”ꅇꈐꏭꂘꅇꑴꅇ、ꉂꅇꑟꅇꈍꑋꐊꀋꐚ。ꋍꈭꐨꈭꄐꈜꄏꌶꌺꀨ，ꈭꀺꈜꀺꌶꌺꁵ，ꌶꌺꏭꉈꇬꑓꇬ、ꌶꌺꏭꁌꒉꄣꅼ、ꌶꌺꏭꇇꀨꇇꄻ，ꌶꌺꊫꂫꃯꇌꏁꇬ。

ꒉꉗꂘꃀꆹꉈꑴꌠꒉꐊꆏꌠꒉꐛ，ꀉꑳꐊꋭꄮꆏꀉꑳꐊ，ꄡꇗꌓꀖꄮꇬꑌꌓꀖ，ꌓꋓꄮꆏꌓꋓ，ꌤꆿꃶꐚꀕꌠꃅ，ꅇꐚꇯꍝꀕꌠꉉ。ꇬꇉꀆꐒꑌ，ꀆꐒꐝꍠꀕ，ꇬꇉꌦꅪꈴ，ꌦꅪꄅꍻꀕ。ꀋꀀꃅꌋꏢꄉꌶꌺꁧꎁꃅ，ꊿꋅꌤꑘꎁꃅꁍꇩꑭꊂꃰ。ꃅꐎꈍꑋꈎꃅꊨꏦꉆꈉꉆꄉꌶꌺꈍꑋꂘꌊꉌꊭꌺꋊꌟꃅꋊꌊꃅꇖꄹꊂꎭꀋꐚ；ꊿꋅꁰꁱꊪꊛ、ꀻꎆꇈꍔꆗꌠꎁꃅꑆꅐꊋꆜꇵꂷꌋꆀꌦꅪꅐꇁꊖꆈꈍꑋꁊꀋꐚ，ꅐꇁꆀꃅꇖꈋꁦꀑꁧꄩꈍꑋꎭꀋꐚꀐ。ꄚꉪꊇꊂꋊꌶꌺꈧꌠꋍꇇꇬꌤꑘꐘꌠꒃꄉꐪꊛꀋꄐꑴꌦ，ꉪꊇꆹꀋꆏꃅꌧꇐꂿꇐꌷꄸꅐꑴꌦꐛꅹ，ꀃꑍꋋꄮꒉꉗꂘꃀꆹꄡꇗꃅꇖꄹꊂꉜꄉꃰꑴꌦ，ꇩꈐꇩꉈꉜꄉꀥꑴꌦ。ꋍꃢꋍꃢꉪꊇꀥꌊꒉꉗꂘꃀꌤꃅꅉꄉꄯꒉꇖꆹꇬꎷꑟꃅ，ꒉꉗꂘꃀꑌꄯꒉꋍꄍꋍꄍꃅꃬꉪꊇꁴ，ꋍꑠꉬꇮꎺꇊꐝꄧꀕ，ꉪꇊꉈꑟꈻ。ꉈꑴꑠꋍꃢꐥꍂꃅꀋꎺꇁꀋꉆ，ꉪꊇꇩꏦꑭꊂꆈꌠꒉꌶꌺꁱꇐꁱꋑꌠꃅꂿꄸꇬꊎꄐꏤꐺꇈ，ꊂꄽꂫꈁꁠꏿꄮꇬꆏ，ꌶꅉꇬꈁꁠꎹꀋꄐꃅꐺꀐ，ꉪꊇꌷꐋꈍꑋꑻꌠꐯꇯꋌꇰꈌꉛꀕꀐ，ꈍꃅꇮꀋꐚꃃꃔꃃꆽꀕꐺꄮꇬ，ꒉꉗꂘꃀꆹꋍꐣꁙꇬꄉꑴꉴꈁꏡꌠꀖꌋꉐꐚꆈꑰꀕꌠꀋꑴꃅꎆꃀꋊꉪꊇꁵꌬꄉꎼ。ꄚꂘꃀꉬꑲꆏꂘꃀꉬꇬꎷꌠꀋꉬ，ꂘꃀꑠꃅꀕꃅꄏꌠꆹꀉꑌꃅꀋꐥꏭꐛ，ꋋꆹꋍꏅꂘꃀꌷꀠꉬꄡꑟ！

ꉘꀋꇉꌠꆏ，ꉢꌶꅉꇬꌷꀋꅐꌦꄮꇬꆏ，ꒉꉗꂘꃀꆹꀱꀉꁁꋍꈚꂘꃀꄻꁧꀐ。ꀊꋨꄮꇬ，ꉪꊇꆹꃶꐚꀕꇰꍝꀕꃅꌭꉆꑲꆀꌭꇬꐥꄉꇈꑟꉂ。ꄚ，ꋍꁁꏯꉪꇬꆏ，ꒉꉗꂘꃀꁧꀐꑴꇬꉌꊈ、ꃅꇐꇰꀋꃀꌠꆹꊏꉪꊇꁵꄉꇉꀐ，ꑠꐛꅹꅉꀕꉪꊇꈭꇍꐥꄉꉪꊇꂘꌠꌡꇬꎷꃅꉪ。ꉈꑴꉢꅉꀕꑠꃅꉪ，ꀋꄸꄷꃆꏂꊂꑋꉠꊨꏦꑴꅉꑌꂘꃀꂷꆹꄻꑲꆏꈍꃅꑋꒉꉗꂘꃀꂘꌷꏡꁈ、ꎖꋪꌋꆀꃅꐨꑽꑌꋋꈨꊪꊛ、ꌶꄻꏭꉪ。

ꀃꑍꋋꄮ，ꉡꆹꍏꇩꏓꂱꁌꄝꂽꑼꂷꉬꄸꅳꍩꆼꁠꏦꌊꁍꇩꃅꋮꆹꈋꐏꁈꐺꀐ。ꄚ，ꀋꎺꇁꀋꉆꌠꆏꒉꉗꂘꃀꅿꉙꅇꂷꅇ、ꑌꇐꑳꇐꌋꆀꃅꐨꑽꑌ，ꌋꐓꂷꇭꌡ、ꌩꋲꃤꃀꌡ、ꏜꒇꉊꈬꌡ、ꒉꈫꄯꁮꌡ，ꄷꀋꁧꐈꌊꊋꃤꂵꇖꀕꑵꐛꄉꉠꏯꈐꊟꊋꊡꐨꀉꒉꐯꀉꒉ，ꑠꐛꅹ，ꉡꆹꉌꂵꈐꏭꄉꄙꇁꉐꃢꃅꈀꎭꀕꄷꉉꋻꌠ。ꀋꄸꄷ，ꊌꆹꊌꉆꑲꆏ，ꑋꊂꌕꆪ，ꉪꊇꆹꐈꌌꑌꆳꆲꌙꀕꄲꐛꑞꁈ，ꁏꇁꇵꂷꅦꇗꀕꌠꒉꉗꂘꃀꏭꌸꑞꁈ；ꎷꊂꌕꆪ，ꉪꊇꆹꐈꃨꎔꃨꋽꋍꀮꐛ，ꃨꎔꃨꋽꐛꄉꒉꉗꂘꃀꌤꃅꅉꏭꋽꒌꄀꑞꁈ；ꍴꊂꌕꆪ，ꉪꊇꆹꐈꌩꂷꀭꇗꀕꁧꐛ，ꉙꐛꃹꐛꆺꄝꃵꌣꀕꌠꒉꉗꂘꃀꍈꎻꑟ；ꋅꊂꌕꆪ，ꉪꊇꆹꐈꃆꄔꊷꆣꀕꇤꐛ，ꄔꐞꑬꆹꇇꆹꋧꌠꒉꉗꂘꃀꇫꑟꉂ。